Akizindua mpango huo kwa Wilaya ya Kinondoni katika viwanja vya Biafra jana mchana, Mkuu wa Wilaya hiyo Geordon Lugimbana amebainisha kuwepo sheria katika Wilaya hiyo zitakazosaidia kuwatia hatiani na kuwaadhibu wachafuzi wa mazingira na hivyo kuhimiza utaratibu mpya wa ustaarabu uanze kujengwa miongoni mwa wakazi ili kulitunza jiji.

‘Sasa Kinondoni tuna sheria za usafi, na tunaweza kumkamata mtu kisha sheria zinatuongoza kwenye hatua za kuchukua’ amefafanua Lugimbana
Katika mkutano huo uliohudhuriwa na wawakilishi mbalimbali wa Kiserikali, taasisi na idara mbalimbali za wilaya za Temeke, Ilala na Kinondoni yenyewe, ulishuhudia uzinduzi wa nyenzo mpya za kuendeshea zoezi hilo zikiwa ni pamoja na Trela 27 za kubebea taka, Trekta 4 na Malori 8 tayari kwa shughuli hiyo.

Kadhalika Mhe. Lugimbana amewasifu wakuu wa idara kwa kutekeleza kwa mafanikio suala la kuhakikisha ujenzi wa madarasa na upelekaji wa watoto wote mashuleni mwaka jana na kuwataka sasa kuhamishia juhudi hizo kwenye suala la usafi kuanzia mwaka huu.

Pia mkuu huyo wa Wilaya amewaka wenyeviti wote wa Serikali za mitaa kuwasilisha kwake kila mmoja mpango wake wa mkakati wa usafi, kutenga eneo maalumu la kulundika taka mtaani kwake, kuunda mpango thabiti na wa uwazi wa kukusanya ada ya usafi kutoka kwa wakazi pamoja na kuajiri vijana wasiopungua 20 kwa ajili ya kukusanya taka kutoka majumbani na kupeleka kwenye dampo la mtaa.