Akizungumza wakati wa zoezi hilo lililofanyika katika uwanja wa Jamhuri, mkuu wa mkoa wa Morogoro Kanali Mstaafu Issa Machibya amesema silaha hizo haramu zimeleta madhara makubwa vikiwemo vifo vya baadhi ya raia, kusababisha majeraha na kutishia amani kwa ujumla kutokana na matukio ya kijambazi.

Nayo taarifa ya polisi imebainisha kuwa chanzo kikuu cha silaha zote hizo zilizokuwa zikimilikiwa kiholela ni kutokana na wimbi la wakimbizi wanaotoka katika nchi mbalimbali kama Burundi na Kongo, pamoja na ambazo zinaingia nchini kihalifu na kwa matukio ya kihalifu.

Aidha Jeshi la Polisi limeeleza mkakati wa kuzihakiki silaha zote zinazomilikiwa na watu binafsi pamoja na makampuni na kuzipiga alama maalumu silaha hizo, kuweza kuzitofautisha au kuzipa utambulisho maalumu.